Ils fatgs da furmaziun svizzers

Ils fatgs da furmaziun svizzers cumpiglian ils suandants stgalims da furmaziun:

  • stgalim primar (inclusiv scolina u stgalim d’entrada)

  • stgalim secundar I

  • stgalim secundar II: furmaziun fundamentala professiunala e scolas da furmaziun generala (scolas da maturitad gimnasiala, scolas medias spezialisadas)

  • stgalim terziar: furmaziun professiunala superiura ordaifer las scolas autas (examens professiunals federals ed examens professiunals federals superiurs, scolas spezialisadas superiuras) e scolas autas (scolas autas universitaras, scolas autas spezialisadas, scolas autas da pedagogia)

  • la furmaziun supplementara.

La responsabladad principala per ils fatgs da furmaziun han ils 26 chantuns: Ils chantuns èn responsabels per ils fatgs da furmaziun, uschenavant che la Constituziun federala na declera betg la Confederaziun sco cumpetenta. Las cumpetenzas da la Confederaziun pertutgan il sectur da furmaziun postobligatoric: Tar las scolas da maturitad gimnasiala, tar la furmaziun professiunala e tar scolas autas èn la Confederaziun ed ils chantuns partenaris en quai che reguarda la responsabladad per ils fatgs da la furmaziun publica. Cunzunt en la scola obligatorica surpiglian las vischnancas differentas incumbensas.

Dapi il 1. da schaner 2013 è l'entir sectur da la furmaziun, perscrutaziun ed innovaziun cumpiglià sin plaun federal en il Departament federal d'economia, furmaziun e retschertga DEFR, l'anteriur Departament federal d'economia DFE. Il Secretariat da stadi per furmaziun e perscrutaziun SFP, ch'appartegneva pli baud al Departament federal da l'intern DFI, e l'Uffizi federal da la furmaziun professiunala e da la tecnologia UFFT èn vegnids reunids en quest nov departament sut il num Secretariat da stadi per furmaziun, retschertga ed innovaziun SEFRI.
Il SEFRI è il center da cumpetenza da la Confederaziun per dumondas da la politica da furmaziun, retschertga ed innovaziun naziunalas ed internaziunalas.

Questa pagina per: Deutsch Français Italiano English

Ultima actualisaziun da questa pagina: 07.08.2017

Job