Furmaziun supplementara

Noziuns da clav: Validaziun da prestaziuns da furmaziun

La furmaziun supplementara serva a meglierar ed ad actualisar cumpetenzas, abilitads ed enconuschientschas existentas sco er a las orientar vers secturs e vers incumbensas novas ed a las amplifitgar il medem mument. Activitads da furmaziun supplementara han lieu ordaifer il sistem da furmaziun formal. Da quai fan part activitads da la furmaziun generala u da la furmaziun orientada a la professiun che han lieu en in rom organisà e che na mainan betg a diploms renconuschids dal stadi (tranter auter curs da furmaziun supplementara, seminaris) ubain process d'emprender ordaifer ina relaziun d'instruir e d'emprender u d'ina pussaivladad d'emprender (tranter auter leger litteratura spezialisada, emprender a la plazza da lavur).

Suenter che la fasa da consultaziun è terminada vegn uss elavurada ina missiva per mauns dal Cussegl naziunal e dal Cussegl dals chantuns.

La gronda part da la populaziun svizra fa en x-ina furma ina furmaziun supplementara. Sch'ina persuna absolva ina furmaziun supplementara, dependa tranter auter da sia motivaziun generala, da las resursas da temp e finanzialas u da la purschida da furmaziuns supplementaras. Persunas cun in'activitad da gudogn a temp cumplain e persunas cun in'activitad da gudogn d'in pensum da passa 50% frequentan plitost ina furmaziun supplementara che persunas cun in'activitad da gudogn da main che 50%. Persunas cun in'activitad da gudogn pli savens che persunas senza activitad da gudogn. Pli aut ch'il nivel da furmaziun è e pli pitschna che l'activitad da furmaziun supplementara è.

Direcziun e cundiziuns generalas da la furmaziun supplementara

Il mund da la furmaziun supplementara svizzer sa distingua tras ina gronda diversitad che pertutga la cumpetenza, la regulaziun, las purschidas e la finanziaziun. La furmaziun supplementara s'orientescha per gronda part a l'economia da martgà. Persunas privatas èn savens las purtadras e las purschidras da furmaziuns supplementaras. La furmaziun supplementara fa en emprima lingia part da l'atgna responsabladad da l'individi e vegn purtada per gronda part da las participantas e dals participants sezs. La Confederaziun ed ils chantuns ageschan mo subsidiarmain en il sectur da la furmaziun supplementara: Entaifer la furmaziun supplementara intervegnan els en quels secturs, dals quals las finamiras ed ils effects prendids en mira na vegnissan betg cuntanschids senza regulaziun correspundenta u senza mesiras da promoziun.

Differentas leschas spezialas da la Confederaziun cuntegnan disposiziuns tar la furmaziun supplementara. Questas regulaziuns èn – sco la furmaziun supplementara en general – sa sviluppadas or da l'istorgia e sa differenzieschan tenor il grad da specificaziun ed adempleschan differentas finamiras: tranter auter:

  • regla la Lescha federala davart la furmaziun professiunala (LFPr) la furmaziun professiunala orientada a la professiun

  • concernan differentas disposiziuns federalas mesiras da reintegraziun en cas da dischoccupaziun u en cas d'invaliditad

  • cuntegnan il dretg d'obligaziuns ed il dretg da lavur medemamain disposiziuns pertutgant la furmaziun supplementara

  • La furmaziun supplementara serva er a l'integraziun socioculturala da gruppas specificas. Mesiras da furmaziun supplementara cun intents specifics per gruppas vegnan sustegnidas particularmain en il rom da la migraziun, da l'illetrissem, da l'egualitad da persunas cun impediments e.u.v.

Tras la revisiun da las disposiziuns concernent la furmaziun en la Constituziun federala (art. 64a Cst.) ha la Confederaziun survegnì la cumpetenza da fixar ils princips da la furmaziun supplementara en ina lescha. Cun la nova lescha da la furmaziun supplementara vegn l’incumbensa constitutiva ad ir en vigur. La lescha integrescha la furmaziun supplementara en il spazi da furmaziun svizzer e fixescha ils principis per ina furmaziun supplementara.

Ils chantuns reglan la furmaziun supplementara orientada a la professiun en las leschas executivas chantunalas tar la Lescha federala davart la furmaziun professiunala. La furmaziun supplementara generala (betg orientada a la professiun) po vegnir organisada giuridicamain ed organisatoricamain en moda differenta da chantun a chantun p.ex. en ina lescha specifica davart la furmaziun supplementara, en il rom da la regulaziun da la furmaziun supplementara orientada a la professiun, en leschas da scola e da cultura u en autras basas legalas. Ils chantuns coordineschan incumbensas surregiunalas da la furmaziun supplementara tras la Conferenza interchantunala per la furmaziun supplementara (CIFS). Sco conferenza speziala da la Conferenza svizra da las directuras e dals directurs chantunals da l'educaziun publica (CDEP) s'engascha la CIFS per in emprender per vita duranta. Ella sa cumpona d'incumbensadas e d'incumbensads chantunals per la furmaziun supplementara.

Questa pagina per: Deutsch Français Italiano English

Ultima actualisaziun da questa pagina: 26.01.2017

Job