Furmaziun da persunas d'instrucziun

Noziuns-clav : Renconuschientscha da diploms da la furmaziun da persunas d'instrucziun / Mobilitad e barat / Process da Bologna / Sistem europeic da transferiment da credits academics (ECTS) / Coordinaziun en il sectur da las scolas autas da pedagogia / Coordinaziun en il sectur da las scolas autas

Scolaziun da persunas d'instrucziun

La scolaziun da persunas d'instrucziun per il stgalim preliminar, per il stgalim primar, per il stgalim secundar I e per las scolas da maturitad gimnasiala sco er per las professiuns en il sectur da la pedagogia speziala ha lieu en scolas autas – per gronda part en scolas autas da pedagogia.

Pervia da lur scolaziuns orientadas a la pratica e pervia da lur perscrutaziun orientada al champ professiunal tutgan las scolas autas da pedagogia tipologicamain tar las scolas autas spezialisadas. Ellas vegnan dentant manadas en autra maniera. Sco basa legala en chaussa vala sin plaun svizzer il dretg da la Conferenza svizra dals directurs chantunals da l'educaziun publica (CDEP) davart la renconuschientscha da diploms. L'incarica da prestaziun da las scolas autas da pedagogia cumpiglia l'instrucziun (scolaziun e furmaziun supplementara), la perscrutaziun ed il svilup orientà a l'applicaziun sco er la furniziun da servetschs.

Las scolaziuns da la furmaziun da persunas d'instrucziun qualifitgeschan per la professiun e cuntegnan parts scientificas, parts didacticas dal rom sco er parts pedagogicas e parts da la pratica professiunala. Ellas collian la teoria e la pratica sco er l'instrucziun e la perscrutaziun. La finamira è quella d'intermediar cumpetenzas da savida e d'agir per l'educaziun e per la furmaziun da scolaras e scolars dals differents stgalims da scola resp. per uffants e giuvenils cun basegns spezials. La furmaziun ha lieu tenor il model da dus stgalims cun studis da bachelor e da master tenor la Decleraziun da Bologna. Las prestaziuns da studi vegnan mesiradas cun puncts dad ECTS. La durada dal studi dependa da la scolaziun elegida. Las absolventas ed ils absolvents dals studis survegnan mintgamai in diplom d'instrucziun per il stgalim da scola respectiv u in diplom professiunal dal sectur da la pedagogia speziala e supplementarmain in diplom da bachelor u da master. (Excepziun: persunas d'instrucziun per scolas da maturitad survegnan mo in diplom d'instrucziun. Il diplom da master vegn fatg en il rom dal studi scientific). Ils diploms d'instrucziun ed ils diploms professiunals èn renconuschids sin nivel svizzer.

  • persuna d'instrucziun per il stgalim preliminar e/u per il stgalim primar

  • Persunas d'instrucziun per il stgalim secundar I

  • persuna d'instrucziun per il stgalim secundar I

  • persuna d'instrucziun per scolas da maturitad

  • scolaziuns en il sectur da la pedagogia speziala: direcziuns d'approfundaziun en educaziun prescolara pedagogic-curativa ed en pedagogia curativa da scola

  • scolaziuns en logopedia ed en terapia da psicomotorica

Scolaziun da persunas responsablas per la furmaziun professiunala

La scolaziun da persunas responsablas per la furmaziun professiunala en manaschis d'emprendissadi, da persunas d'instrucziun en scolas professiunalas spezialisadas ed en scolas spezialisadas superiuras sco er da persunas d'instrucziun da la furmaziun supplementara professiunala ha lieu en scolas autas ed en ulteriuras instituziuns da furmaziun. La scolaziun da persunas responsablas per la furmaziun professiunala vegn reglada da la Confederaziun en il rom da la furmaziun professiunala. Las scolaziuns varieschan tut tenor il stgalim destinà e tenor il pensum d'instrucziun (activitad professiunala principala u activitad professiunala accessorica).

Questa pagina per: Deutsch Français Italiano English

Ultima actualisaziun da questa pagina: 20.03.2018

Job