Scola media spezialisada (SMS)

Noziuns da clav: Mobilitad e barat / Cussegliaziun da professiun, da studi e da carriera

Scolas medias spezialisadas èn scolas da la furmaziun generala dal stgalim secundar II. Ellas preparan per ina furmaziun professiunala en tscherts champs da professiun a scolas spezialisadas superiuras (scolaziun da scola media spezialisada) ed a scolas professiunalas superiuras (scolaziun da maturitad spezialisada). Ellas porschan in'alternativa tar la maturitad professiunala e tar la maturitad gimnasiala cun preparar per ina furmaziun professiunala superiura, e quai sin la via da scola en ina moda relativa al champ da professiun. Las scolas medias spezialisadas èn sa sviluppadas or da las scolas medias da diplom (SMD) ed han remplazzà quellas successivamain a partir dals onns 2003/2004. La scolaziun en ina scola media spezialisada e la scolaziun da maturitad spezialisada vegnan absolvidas da circa 5% da las scolaras e dals scolars dal stgalim secundar II. La scolaziun en ina scola media spezialisada vegn tschernida en emprima lingia da dunnas.

Las scolas medias spezialisadas (SMS) ston esser renconuschidas da la Conferenza svizra da las directuras e dals directurs chantunals da l'educaziun publica (CDEP). Sco basa valan il Reglament davart la renconuschientscha dals diploms da las scolas medias professiunalas sco er differentas directivas. Scolas medias spezialisadas datti en 22 chantuns. Ellas vegnan manadas oravant tut dals chantuns; qua u là datti er purschiders privats da scolas medias spezialisadas.

Scolaziuns a scolas medias spezialisadas

L'entrada en la scola media spezialisada ha lieu suenter la scola obligatorica (15avel onn da vegliadetgna). Las cundiziuns d'admissiun èn regladas sin plaun chantunal. I pon vegnir realisads examens d'admissiun e/u discurs d'admissiun. L'entrada a la scola media spezialisada po er avair lieu senza examen. La scolaziun a temp cumplain dura 3 onns. Acquistà vegn in certificat da scola media spezialisada ch'è renconuschì en tut la Svizra. Quest certificat pussibilitescha l'access a scolas spezialisadas superiuras (SSS) en il champ da professiun absolvì.

Scolaziun cun certificat da SMS e cun maturitad spezialisada

La scolaziun da maturitad spezialisada è ina scolaziun supplementara dad 1 onn. Ella vegn absolvida suenter la scolaziun da scola media spezialisada. Betg tut ils chantuns na porschan questa scolaziun. Acquistà vegn in attestat da scola media spezialisada ch'è renconuschì en tut la Svizra. L'attestat da scola media spezialisada pussibilitescha l'access direct (senza examen) ad in studi per persunas d'instrucziun per la scola preliminara e per il stgalim primar che vegn purschì ad ina scola auta da pedagogia sco er in access direct a scolaziuns da scolas autas spezialisadas en il champ da professiun absolvì. Tut tenor il studi en mira èsi necessari da reussir la procedura d’admissiun specifica per survegnir access ad ina scola auta spezialisada. Cun reussir l'examen cumplementar tenor il reglament davart la passarella pussibilitescha la maturitad spezialisada professiunala l‘access a las scolas autas universitaras.

Repetiziun d'in examen

Persunas creschidas pon absolver ina scolaziun da maturitad ad ina scola media professiunala u ad ina scola da maturitad professiunala en ina scola da creschids a temp cumplain u a temp parzial.

Questa pagina per: Deutsch Français Italiano English

Ultima actualisaziun da questa pagina: 09.05.2017

Job