Scola obligatorica

Noziuns da clav: Expensas dal maun public per la furmaziun / Standards da furmaziun / Svilup e garanzia da la qualitad en il sectur da furmaziun / Plans d'instrucziun tenor regiuns linguisticas / Cundiziuns generalas giuridicas en la pedagogia speziala / Mobilitad e barat

L'obligaziun d'ir a scola dura indesch onns. Il stgalim primar – inclusiv dus onns scolina u ils emprims dus onns d'in stgalim d'entrada – cumpiglia otg onns. Il stgalim secundar I dura trais onns. En il chantun Tessin cuzza il stgalim secundar I (scuola media) quatter onns. Al cumenzament da lur obligaziun d'ir a scola han ils uffants per regla quatter onns.

I dat intgins paucs chantuns en la Svizra tudestga, nua che la scolina n'è betg obligatorica u nua ch'ella vegn frequentada obligatoricamain mo in onn. Ma er en quests cas va per regla la gronda maioritad dals uffants durant dus onns a scolina. En intgins chantuns da la Svizra tudestga pon las vischnancas manar in stgalim fundamental u stgalim da basa. Tar questa furma d'organisaziun frequentan ils uffants da quatter fin otg onns resp. da quatter fin set onns la medema classa. En la Svizra franzosa quintan ils dus onns da scolina per regla tar il «cycle 1» u «cycle primaire 1» che dura quatter onns. En il chantun Tessin vegn purschì supplementarmain als dus onns da scolina obligatorics in ulteriur onn per uffants a partir da trais onns.

Organisaziun da la scola obligatoria

Ils chantuns èn responsabels per la scola obligatorica. Els fixeschan ils plans d'instrucziun ed ils uraris e decidan davart ils meds d'instrucziun. Tenor la Cunvegna interchantunala davart l’armonisaziun da la scola obligatorica succeda l’armonisaziun dals plans d’instrucziun e la coordinaziun da meds d’instrucziun en las regiuns linguisticas. La Svizra franzosa ha gia introducì il «Plan d’études romand (PER)». En ils chantuns germanofons e plurilings exista il Plan d’instrucziun 21. Ils chantuns èn responsabels per l’introducziun dal plan d’instrucziun. En il chantun Tessin è il plan d’instrucziun en elavuraziun. Las vischnancas organiseschan il manaschi da scola. Perquai che la glieud è localmain francada fitg ferm, datti soluziuns adattadas al lieu.

La frequentaziun da la scola publica obligatorica è gratuita per tut ils uffants. 95% dals uffants frequentan instituziuns publicas. L'obligaziun d'ir a scola vala er per uffants che n'han betg in status da dimora reglà. En scola sa scuntran scolaras e scolars cun differents stadis da svilup, cun differentas capacitads da prestaziun cun differentas derivanzas socialas e linguisticas sco er cun differents cumportaments. L'eterogenitad da prestaziun e da talent da las scolaras e dals scolars sco er l'eterogenitad culturala da las classas è ina gronda sfida per la scola. Cun mesiras correspundentas garantescha la scola in emprender cuminaivel. Las scolaras ed ils scolars pon profitar d'ina instrucziun differenzianta ed individualisanta e vegnan sustegnids en moda individuala da las persunas d'instrucziun da la scola regulara u eventualmain da persunas spezialisadas (p.ex. pedagogas e pedagogs curativs da scola). Tar las mesiras da promoziun en la scola regulara tutgan tranter auter la promoziun d'uffants talentads, la promoziun linguistica, la promoziun linguistica per uffants da lingua estra, la promoziun en singuls roms, la logopedia, la psicomotorica e.u.v. Sch'il basegn da promoziun surpassa las pussaivladads da l'instrucziun regulara, vegnan applitgadas mesiras rinforzadas.

Questa pagina per: Deutsch Français Italiano English

Ultima actualisaziun da questa pagina: 09.05.2017

Job