Soluziuns transitoricas

La Lescha federala davart la furmaziun professiunala (LFPr) prevesa ch'ils chantuns prendian mesiras per preparar giuvenils, che han deficits individuals da furmaziun a la fin dal temp da scola obligatoric, per la furmaziun fundamentala professiunala. Per giuvenils che na pon betg cumenzar – suenter ch'els han terminà il stgalim secundar I – directamain ina furmaziun fundamentala professiunala u ina scola da cuntinuaziun dal stgalim secundar II, stattan a disposiziun soluziuns transitoricas.

Tras questas soluziuns transitoricas duai vegnir gidà als giuvenils da chattar la dretga professiun e da s'integrar en il mund da lavur, ed els duain vegnir preparads per entrar en las scolas da furmaziun generala dal stgalim secundar II. En quest connex vegnan promovidas qualificaziuns centralas e serradas largias individualas. Soluziuns transitoricas èn facultativas e ston tut tenor vegnir pajadas. Ellas enconuschan proceduras d'admissiun specificas. Per regla duran ellas fin ad 1 onn.

Da las soluziuns transitoricas datti differents models, tranter auter:

  • purschidas da scola: intermediaziun d'ina furmaziun generala senza part pratica

  • soluziuns transitoricas d'integraziun: instrucziun per giuvenils da lingua estra cun in pais spezial sin l'acquist da la lingua naziunala sco er sin l'integraziun en la vita sociala, per part cun praticums

  • emprendissadi preliminar: activitad pratica en in manaschi cumbinada cun ina part da scola

  • curs preliminars sco furmaziun preliminara per ina tscherta scolaziun, sco p.ex. in curs preliminar per scolaziuns dal sectur creativ

Ulteriuras infurmaziuns

Questa pagina per: Deutsch Français Italiano English

Ultima actualisaziun da questa pagina: 10.06.2015

Job