Stgalim primar

Noziuns da clav: Standards da furmaziun / Uras da bloc / Stgalim fundamental e stgalim da basa (Grund- und Basisstufe) / Instrucziun da linguas / Plans d'instrucziun tenor regiuns linguisticas / Structuras dal di cumplementaras a la famiglia / Lingua d'instrucziun / Cundiziuns generalas giuridicas en la pedagogia speziala

Il stgalim primar – inclusiv dus onns scolina u ils emprims dus onns d'in stgalim d'entrada – cumpiglia otg onns. I dat intgins paucs chantuns en la Svizra tudestga, nua che la scolina n'è betg obligatorica u nua ch'ella vegn frequentada obligatoricamain mo in onn. Ma er en quests cas va per regla la gronda maioritad dals uffants durant dus onns a scolina. En intgins chantuns da la Svizra tudestga pon las vischnancas manar in stgalim fundamental u stgalim da basa (ina furma sumeglianta al stgalim d’entrada). Tar questa furma d'organisaziun frequentan ils uffants da quatter fin otg onns resp. da quatter fin set onns la medema classa. En la Svizra franzosa quintan ils dus onns da scolina per regla tar il «cycle 1» u «cycle primaire 1» che dura quatter onns. En il chantun Tessin vegn purschì supplementarmain als dus onns da scolina obligatorics in ulteriur onn per uffants a partir da trais onns.

Scolarisaziun

Ils chantuns fixeschan la vegliadetgna per entrar en il stgalim primar (scolina u stgalim d'entrada). Sch'ils uffants cuntanschan la vegliadetgna respectiva fin il di da referenza fixà (per gronda part è quai ils 31 da fanadur), entran els en il stgalim primar sin il cumenzament da l'onn da scola (atun). Ils uffants èn per regla tranter quatter e tschintg onns. Sin dumonda dals geniturs poi vegnir pussibilità a l'uffant d'entrar pli baud u pli tard en scola.

Finamiras da l'instrucziun ed organisaziun da l'instrucziun

A l'entrada en il stgalim primar (scolina u stgalim d'entrada) sa distinguan ils uffants areguard lur savida, lur capacitads, lur stadi da svilup e lur premissas linguisticas. Partind da questa eterogenitad è la finamira quella, da svegliar il svilup e l'emprender da tut ils uffants. Il svilup da las cumpetenzas vegn promovì tras ambients da giugar e d'emprender interessants. Ils uffants s'acquistan pass per pass la basa da la cumpetenza sociala e da la moda da lavurar en scola. Il temp ch'els dovran per percurrer ils emprims onns da scola dependa da lur svilup intellectual e da lur madirezza emoziunala; eventualmain survegnan ils uffants in sustegn tras mesiras spezialas. En scolina resp. en il stgalim d'entrada s'orientescha l'instrucziun fermamain vi dal svilup dals uffants. L'instrucziun vegn organisada e concepida en emprima lingia en moda interdisciplinara. Il gieu ha gronda impurtanza. Ils uffants vegnan manads pass per pass a l'emprender en ils secturs spezials.

Suenter la scolina resp. suenter il stgalim d'entrada vegnan instruids per regla ils suandants secturs spezials e roms:

  • linguas: lingua da scola, linguas estras (ina segunda lingua naziunala ed englais)

  • matematica e scienzas natiralas

  • scienzas socialas ed umanas: tranter auter geografia, istorgia, etica e religiuns

  • musica, art ed art applitgà: musica, furmaziun creativa, furmaziun textila, furmaziun tecnica

  • moviment e sanadad: moviment e da sport

Differentas tematicas sco l'utilisaziun da tecnologias novas d'infurmaziun e da communicaziun, la promoziun da la sanadad, la furmaziun per in svilup persistent u per la furmaziun politica vegnan savens instruidas en moda integrada en auters roms u secturs spezials.

Ils chantuns èn responsabels per ils plans d'instrucziun. Els fixeschan il dumber da lecziuns en lur uraris. Tenor la Cunvegna interchantunala davart l'armonisaziun da la scola obligatorica (Concordat HarmoS) ha lieu l'armonisaziun dals plans d'instrucziun e la coordinaziun dals meds d'instrucziun sin il plaun da las regiuns linguisticas. Ils chantuns da lingua franzosa han gia introducì il «Plan d’études romand (PER)». En ils 21 chantuns tudestgs e plurilings è avant maun il «Plan d'instrucziun 21». L'introducziun dal Plan d'instrucziun 21 è chaussa dals chantuns. En il chantun Tessin vegn il plan d'instrucziun actualmain repassà.

La maioritad dals chantuns ha introducì uras da bloc cumplessivas. Ils chantuns e lur vischnancas porschan differents tips da structuras dal di. Cun uras da bloc u cun structuras dal di (p.ex. maisa da mezdi, scola dal di) gidan ils chantuns e lur vischnancas a simplifitgar l'organisaziun da la tgira d'uffants famigliara, en spezial per geniturs che han in'activitad da gudogn.

Giudicament da las scolaras e dals scolars

Il giudicament dals uffants en scolina resp. en il stgalim d'entrada n'enconuscha per regla naginas notas en cifras. Ils instruments per giuditgar èn savens fegls d'observaziun che servan sco basa per ils discurs da giudicament. Il giudicament è orientà a la promoziun e resguarda il svilup persunal da l'uffant.

Sche las prestaziuns survegnan notas, tanscha la scala per regla dad 1 fin 6 (6 = meglra nota; 4 = suffizient; sut 4 = insuffizient). Il giudicament cun notas en cifras na cumenza betg en tut ils chantuns a medem temp. Durant ils onns da scola, nua ch'i na vegnan anc betg fatgs attestats da notas, vegnan applitgads rapports senza notas davart l'emprender u autras proceduras da giudicament. Per gronda part survegnan las scolaras ed ils scolars duas giadas per onn, a la fin d'in semester, in attestat da notas resp. in rapport davart l'emprender. Il giudicament da las prestaziuns en scola vegn duvrà sco basa per midar en la proxima classa (promoziun) e per midar en il proxim stgalim. La repetiziun d'ina classa è per gronda part previsa en las leschas chantunalas da scola, vegn dentant applitgada differentamain. I pon vegnir ordinadas mesiras da promoziun spezialas.

En divers chantuns vegn fatg durant tscherts onns da scola ed en tscherts roms examens finals obligatorics u facultativs, tests d’orientaziun e da cumparegliaziun u mesiraziuns dal livel da prestaziun da la classa. Quels pon vegnir duvrads sco basa per determinar il livel u per giuditgar las prestaziuns da las scolaras e dals scolars. Las persunas d’instrucziun pon uschia valitar la prestaziun da la classa en cumparegliaziun cun il success d’emprender d’autras classas.

Questa pagina per: Deutsch Français Italiano English

Ultima actualisaziun da questa pagina: 09.02.2017

Job