Accreditaziun da las scolas autas

L'accreditaziun è ina procedura formala e transparenta che controlla a maun da standards definids, sche las instituziuns e lur programs da studi adempleschan las pretensiuns a la qualitad che vegnan definidas da la Confederaziun. Las proceduras d'accreditaziun duain tranter auter gidar a cuntanscher la renconuschientscha internaziunala ed a meglierar la cumparegliabladad dals diploms da scola auta.


La Lescha federala davart l'agid a las scolas autas e davart la coordinaziun en il sectur da las scolas autas svizras (LASA) ch'è entrada en vigur il 1. da schaner 2015 oblighescha las scolas autas (scolas autas universitaras, scolas autas spezialisadas, scolas autas da pedagogia) da far in'accreditaziun instituziunala. Sin proposta da l'Agentura svizra d'accreditaziun decida il Cussegl svizzer d'accreditaziun davart l'accreditaziun instituziunala e davart l'accreditaziun da programs da las scolas autas; questa ultima n'è betg obligatorica.


Cun l'accreditaziun instituziunala survegnan las scolas autas il dretg da duvrar en lur num la designaziun «universitad», «scola auta spezialisada» u «scola auta da pedagogia» ubain ina designaziun deducida da quai, sco en spezial «institut universitar» u «institut da scola auta spezialisada». Purschiders privats ston sa suttametter a la medema procedura d'accreditaziun, sch'els vulan purtar la designaziun protegida sin nivel naziunal. Per las universitads e per las scolas autas spezialisadas da dretg public è l'accreditaziun instituziunala ultra da quai la premissa per avair il dretg da survegnir contribuziuns finanzialas da la Confederaziun. Las scolas autas e las autras instituziuns dal sectur da las scolas autas ston sa laschar accreditar instituziunalmain fin il pli tard 8 onns suenter l'entrada en vigur da la LASA.


Per l'accreditaziun instituziunala valan tranter auter las suandantas premissas:

La scola auta ha in sistem da qualitad che garantescha che l'instrucziun, la perscrutaziun e las prestaziuns da servetschs èn d'auta qualitad e ch'il persunal è qualifitgà correspundentamain. La scola auta universitara e la scola auta spezialisada porschan instrucziun, perscrutaziun e prestaziuns da servetschs en pliras disciplinas u en plirs secturs spezials.


L'accreditaziun da programs è voluntara. Accreditads vegnan programs da studi da scolas autas e d'autras instituziuns dal sectur da las scolas autas. La premissa per l'accreditaziun da programs è la garanzia da la scola auta e da las autras instituziuns dal sectur da las scolas autas da porscher ina instrucziun d'auta qualitad e da permetter ch'il program da studi possia vegnir terminà.

Questa pagina per: Deutsch Français Italiano English

Ultima actualisaziun da questa pagina: 08.06.2018

Services

Job