Cundiziuns generalas giuridicas en la pedagogia speziala

Ils dretgs dals uffants e dals giuvenils cun in basegn da furmaziun spezial vegnan reglads en la Constituziun federala sco er en pliras leschas federalas. La Constituziun federala da la Confederaziun svizra sa referescha per exempel en l'art. 19 (dretg d'instrucziun da scola fundamentala) ed en l'art. 62 (fatgs da scola) al dretg da la scolaziun speziala.


Er la legislaziun naziunala regla las cumpetenzas, las premissas per il dretg d'ina tala scolaziun ed ils dretgs da survegnir ina tala prestaziun en differentas leschas. Ina basa centrala è la Lescha davart l'egualitad da persunas cun impediments (LImp) ch'è entrada en vigur il 1. da schaner 2004. Ella cuntegna ina disposiziun davart la scolaziun adequata d'uffants e da giuvenils cun impediments: Art. 20 al. 1: «Ils chantuns procuran che uffants e giuvenils impedids survegnian ina scolaziun da basa adattada a lur basegns spezials.» Al. 2: «Ils chantuns promovan cun furmas da scolaziun correspundentas l'integraziun d'uffants e da giuvenils impedids en la scola regulara, uschenavant che quai è pussaivel e serva al bainstar da l'uffant u dal giuvenil impedì.»


Concordat da la pedagogia speziala

Dapi il 1. da schaner 2008 èn ils chantuns responsabels per l'entir champ specific, giuridic e finanzial da la scolaziun speziala d'uffants e giuvenils sco er per las mesiras da la pedagogia speziala. L'assicuranza d'invaliditad è sa retratga da la finanziaziun ed uschia er da la participaziun a la reglamentaziun. Ils chantuns reglan la furma da la scolaziun speziala en la «Cunvegna interchantunala davart la collavuraziun en il sectur da la pedagogia speziala» en furma d'in contract statal liant (concordat). Ils chantuns che fan part dal concordat s'obligheschan d'observar tschertas ordinaziuns da basa. Co che mintga chantun organisescha concretamain las mesiras da la pedagogia speziala, è chaussa d'in concept chantunal da pedagogia speziala. Cun u senza participaziun al concordat èn tut ils chantuns obligads d'elavurar in tal concept. Quest concept vegn approvà d'ina autoritad chantunala (regenza u parlament).


En il Concordat da pedagogia speziala fixeschan ils chantuns in rom naziunal per las mesiras las pli impurtantas en il sectur da la pedagogia speziala. Ils elements centrals da quest concordat èn instruments naziunals en il sectur da la terminologia, standards da qualitad per renconuscher purschiders da prestaziuns sco er ina procedura da scleriment standardisada per eruir il basegn individual. Tenor il concordat han tut ils uffants e tut ils giuvenils (da 0 fin 20 onns) che han in basegn da furmaziun spezial e che vivan en Svizra il dretg da mesiras da la pedagogia speziala. La purschida da mesiras vegn fixada dals chantuns e cumpiglia las suandantas prestaziuns:

  • cussegliaziun e sustegn

  • educaziun prescolara pedagogic-curativa, logopedia e terapia psicomotorica

  • mesiras da la pedagogia speziala en ina scola regulara u speziala

  • assistenza en structuras dal di u collocaziun staziunara en instituziuns da la pedagogia speziala (tut tenor basegn)

Il concordat è entrà en vigur l'onn 2011.

Questa pagina per: Deutsch Français Italiano English

Ultima actualisaziun da questa pagina: 17.12.2018

Services

Job