Cussegliaziun da professiun, da studi e da carriera

La cussegliaziun da professiun sustegna giuvenils tar lur emprima tscherna da la professiun e persunas creschidas tar lur tscherna dal studi e tar la planisaziun da la carriera. Il spectrum tanscha da l'entrada en il mund professiunal sur scolaziuns da cuntinuaziun fin ad ina nova orientaziun professiunala. Durant il stgalim secundar I frequentan las scolaras ed ils scolars lecziuns che preparan per la tscherna da la professiun. En questas lecziuns vegnan ellas ed els intimads da ponderar davart lur vita futura, d'analisar lur abilitads e lur giavischs professiunals ed eventualmain da consultar posts d'infurmaziun.


Tenor la Lescha federala davart la furmaziun professiunala (LFPr) procuran ils chantuns per la cussegliaziun da professiun, da studi e da carriera. Mintga chantun maina posts correspundents per la cussegliaziun da professiun, da studi e da carriera. Quests posts da cussegliaziun porschan cussegliaziuns, agids per sa decider tar la tscherna da la professiun, infurmaziuns, documents ed expertisas. Ultra da quai mainan els ils Centers d'infurmaziun professiunala (CIP) cun infurmaziuns davart professiuns, davart scolaziuns e davart furmaziuns supplementaras. Las manadras ed ils manaders chantunals da las cussegliaziuns da professiun, da studi e da carriera èn unids en la Conferenza svizra da las directuras e dals directurs da la cussegliaziun professiunala, universitara e da carriera (CDCPU). La CDCPU tracta tut las dumondas che pertutgan ina coordinaziun da la cussegliaziun da professiun da studi e da carriera en ils chantuns.


Dapi l'onn 2007 exista il Center svizzer da servetschs per la furmaziun professiunala, cussegliaziun da professiun, da studi e da carriera (CSCP). El furnescha servetschs en champs d'incumbensa ch'èn vegnids surdads als chantuns tras la Lescha federala davart la furmaziun professiunala. Latiers tutgan tranter auter la producziun da meds d'infurmaziun per la cussegliaziun da professiun, da studi e da carriera sco er la garanzia da la furmaziun supplementara d'expertas e d'experts en il sectur da la cussegliaziun da professiun, da studi e da carriera.

Questa pagina per: Deutsch Français Italiano English

Ultima actualisaziun da questa pagina: 17.12.2018

Services

Job