Diplom professiunal per persunas creschidas

La Lescha federala davart la furmaziun professiunala (LFPr) garantescha ch'in diplom renconuschì da la Confederaziun possia vegnir acquistà sin differentas vias da furmaziun. Actualmain pon persunas creschidas senza diplom professiunal tscherner quatter vias etablidas per far il diplom professiunal giavischà. Duas vias na premettan nagin contract d'emprendissadi, per las duas autras vias dovri in contract d'emprendissadi cun in manaschi d'emprendissadi.

  1. Admissiun directa a l'examen final:

    Persunas creschidas che han in'experientscha professiunala da 5 onns (ina part da quai en la professiun en mira) pon sa preparar individualmain per la procedura da qualificaziun (examen final d'emprendissadi).

  2. Validaziun da prestaziuns da furmaziun:

    Persunas creschidas che han in'experientscha professiunala da 5 onns (ina part da quai en la professiun en mira) pon cumprovar en tschertas professiuns – a maun d'in dossier – ch'ellas disponian da las cumpetenzas pretendidas. Il dossier vegn examinà d'in team d'experts.

  3. Furmaziun fundamentala professiunala scursanida:

    Persunas creschidas che han in'experientscha professiunala da plirs onns u in diplom professiunal renconuschì (emprima professiun) pon reducir la furmaziun fundamentala professiunala per 1 fin 2 onns (tut tenor la furmaziun preliminara). Per quest intent fan ellas in contract d'emprendissadi cun in manaschi d'emprendissadi. La scolaziun finescha cun la procedura da qualificaziun (examen final d'emprendissadi).

  4. Furmaziun fundamentala professiunala regulara:

    Persunas creschidas pon absolver ina furmaziun fundamentala professiunala regulara. Per quest intent fan ellas in contract d'emprendissadi cun in manaschi d'emprendissadi. Tut tenor la professiun dura la scolaziun 2, 3 u 4 onns. La scolaziun finescha cun la procedura da qualificaziun (examen final d'emprendissadi).

Questa pagina per: Deutsch Français Italiano English

Ultima actualisaziun da questa pagina: 17.12.2018

Services

Job