Expensas per la furmaziun

L'onn 2014 importavan las expensas dal maun public per la furmaziun 36 milliardas francs. Cun var 29,3 milliardas francs portan ils chantuns e lur vischnancas la part principala da las expensas dal maun public per la furmaziun; la Confederaziun finanziescha 6,1 milliardas francs.

  • Scola obligatorica (17,8 milliardas francs)
    Stgars la mesadad da las expensas dal maun public per la furmaziun pertutgan il sectur da la scola obligatorica (inclusiv scolina e scolas cun in plan d'instrucziun spezial). La finanziaziun vegn surpigliada dals chantuns e da lur vischnancas.

  • Scolas da maturitad gimnasiala, scolas medias spezialisadas (2,3 milliardas francs)
    La finanziaziun da las scolas da la furmaziun generala dal stgalim secundar II è chaussa dals chantuns e da lur vischnancas.

  • Furmaziun professiunala (furmaziun fundamentala professiunala: 3,5 milliardas francs; furmaziun professiunala superiura: 370 milliuns francs)
    En la furmaziun professiunala surpiglian ils chantuns la part principala da las expensas dal maun public per la furmaziun. Sin basa da la nova Lescha federala davart la furmaziun professiunala (LFPr) finanziescha la Confederaziun in quart da las expensas dal maun public per la furmaziun professiunala.

    Ultra da la finanziaziun publica gidan las organisaziuns dal mund da lavur (OdML) a finanziar la furmaziun professiunala. Ils examens professiunals federals ed ils examens professiunals federals superiurs sco er la furmaziun supplementara orientada a la professiun vegnan finanziads per ina part essenziala da las studentas e dals students sco er da lur patrunas e patruns. A partir da l'onn 2018 survegnan absolventas ed absolvents da curs, che sa preparan per in examen professiunal federal u per in examen professiunal federal superiur, in sustegn finanzial direct da la Confederaziun.

  • Scolas autas e perscrutaziun (11,4 milliardas francs)
    Per las universitads chantunalas e per las scolas autas spezialisadas portan ils chantuns la part principala da las expensas dal maun public per la furmaziun; la Confederaziun gida cun contribuziuns finanzialas. Las scolas autas da pedagogia vegnan finanziadas dals chantuns. La finanziaziun da las duas Scolas politecnicas federalas (SPF) è chaussa da la Confederaziun. Ultra da quai sustegna la Confederaziun las scolas autas cun ils uschenumnads meds finanzials secundars che vegnan concedids en moda cumpetitiva per projects da perscrutaziun.

    Supplementarmain a la finanziaziun publica tras ils chantuns e tras la Confederaziun sa participeschan parts privatas (tranter auter cun taxas da studi, cun mandats da perscrutaziun, cun retgavs da la furmaziun supplementara, cun fundaziuns) a la finanziaziun da las scolas autas.

Datas UST (2016)

Questa pagina per: Deutsch Français Italiano English

Ultima actualisaziun da questa pagina: 06.06.2018

Services

Job