Furmaziun professiunala

Noziuns-clav : Purschidas transitoricas / Management da cas furmaziun professiunala

La furmaziun professiunala d'umans che han in basegn da furmaziun spezial e l'integraziun d'umans cun impediments en il mund da lavur èn ozendi temas impurtants. Ultra da las instituziun federals (Secretariat da stadi per furmaziun, retschertga ed innovaziun (SEFRI), Uffizi federal d'assicuranzas socialas (UFAS)) e dals chantuns s'engaschan er las associaziuns (INSOS) fermamain per l'integraziun professiunala. Tenor la Lescha federala davart la furmaziun professiunala (LFPr) èn ils chantuns obligads da preparar ils giuvenils per la furmaziun fundamentala professiunala, sche quels han deficits da furmaziun suenter il temp da scola obligatoric. Per giuvenils senza ina soluziun da cuntinuaziun porschan ils chantuns – sco «punt» dal stgalim secundar I al stgalim secundar II – differentas mesiras che preparan per la professiun (p.ex. purschidas transitoricas, manaschament da cas, onn che prepara per la professiun etc.).

En il rom da la furmaziun fundamentala professiunala èn regladas en la Lescha federala davart la furmaziun professiunala la furmaziun fundamentala professiunala da 3 u da 4 onns (cun Attestat federal da qualificaziun AFQ) sco er la furmaziun fundamentala professiunala da 2 onns (cun Attest federal da furmaziun professiunala AFP). En spezial la furmaziun fundamentala da 2 onns cun AFP sa drizza a giuvenils che han in basegn da furmaziun spezial. Per giuvenils che han in basegn da furmaziun pli grond porscha INSOS Svizra supplementarmain ina scolaziun pratica (SPr). Questa scolaziun s'orientescha fermamain a las abilitads individualas dals giuvenils.

En connex cun la furmaziun fundamentala professiunala vegnan offridas – sco purschidas da sustegn e d'accumpagnament – mesiras supplementaras per giuvenils che han in basegn da furmaziun spezial. I sa tracta qua da curs da sustegn, d'accumpagnaments individuals, da prolungaziun dal temp da furmaziun u da manaschament da cas furmaziun professiunala.

Questa pagina per: Deutsch Français Italiano English

Ultima actualisaziun da questa pagina: 25.06.2019

Services

Job