Furmaziun professiunala svizra

Tar la furmaziun professiunala tutgan la furmaziun fundamentala professiunala, la furmaziun professiunala superiura e la furmaziun supplementara orientada a la professiun. Il sistem svizzer da la furmaziun professiunala cun sia concepziun duala sin il stgalim secundar II e cun ina furmaziun professiunala superiura sin il stgalim terziar ordaifer las scolas autas sa differenziescha d'auters sistems europeics da la furmaziun professiunala. El è caracterisà d'ina gronda permeabilitad e porscha in vast spectrum da scolaziuns e da furmaziuns supplementaras. Ina caracteristica per la Svizra è la stretga collavuraziun tranter la Confederaziun, ils chantuns e las organisaziuns dal mund da lavur. L'economia sa participescha cun definir ils cuntegns e las finamiras da la furmaziun e cun scolar la generaziun giuvna.


Sa basond sin la revisiun da la Constituziun federala dals 18 d'avrigl 1999 (art. 63 Cst.) ha la Confederaziun survegnì la cumpetenza da reglar legalmain l'entira furmaziun professiunala. Cun la Lescha federala dals 13 da december 2002 davart la furmaziun professiunala (LFPr) èn tut las professiuns che stattan ordaifer il sistem da las scolas autas suttamessas ad in sistem unitar. La Lescha federala davart la furmaziun professiunala è entrada en vigur il 1. da schaner 2004 ed ha recepì sut la cumpetenza da la Confederaziun las professiuns che vegnan regladas en auters decrets federals da l'agricultura e da la selvicultura sco er che vegnivan regladas avant sin plaun chantunal resp. interchantunal da la sanadad, dals fatgs socials e da l'art. Uschia vegn garantida in'unifurmitad concernent las cundiziuns generalas, sco las basas legalas, ils certificats ed ils diploms, las proceduras da renconuschientscha, ils plans d'instrucziun generals e.u.v.

Questa pagina per: Deutsch Français Italiano English

Ultima actualisaziun da questa pagina: 08.06.2018

Services

Job