Instrucziun da linguas

La Svizra ha quatter linguas naziunalas: tudestg, franzos, talian e rumantsch. En in pajais pluriling ha la coordinaziun da l'instrucziun da linguas perquai ina impurtanza speziala. Il mars 2004 ha la Conferenza svizra dals directurs chantunals da l'educaziun publica (CDEP) deliberà ina strategia naziunala per sviluppar vinavant l'instrucziun da linguas. Ils cuntegns ils pli impurtants da la strategia èn vegnids integrads en la Cunvegna interchantunala davart l'armonisaziun da la scola obligatorica (Concordat HarmoS):

  • a partir dal stgalim primar vegnan instruidas duas linguas estras (ina segunda lingua naziunala ed englais);

  • l'emprima lingua estra vegn instruida il pli tard a partir dal 3. onn da scola primara (tenor la moda da quintar da HarmoS a partir dal 5. onn da scola), la segunda lingua estra il pli tard a partir dal 5. onn da scola primara (tenor la moda da quintar da HarmoS a partir dal 7. onn da scola);

  • ils chantuns Grischun e Tessin pon divergiar da quest sistem, sch'els instrueschan supplementarmain ed obligatoricamain anc ina terza lingua naziunala;

  • la dumonda, tge lingua che sto vegnir instruida sco emprima, vegn coordinada sin plaun regiunal;

  • ils standards da furmaziun naziunals defineschan las cumpetenzas fundamentalas che ston vegnir cuntanschidas da tut las scolaras e da tut ils scolars;

  • durant la scola obligatorica vegn messa a disposiziun ina purschida commensurada d'ina instrucziun facultativa en ina terza lingua naziunala.

Uffants da lingua estra pon profitar da mesiras da promoziun en la lingua da scola sco er da la pussaivladad da frequentar curs en lur lingua da derivanza (instrucziun en la lingua ed en la cultura da la patria, instrucziun LCP).


Las valurs directivas da la strategia da linguas da l'onn 2004 èn vegnidas introducidas en 23 chantuns: En 22 chantuns emprendan ils uffants l'emprima lingua estra il pli tard a partir dal 3. onn da scola primara e la segunda lingua estra a partir dal 5. onn da scola primara. Il chantun Tessin ha ses agen model cun trais linguas estras obligatoricas.

* Nova moda da quintar ils stgalims da scola tenor il Concordat HarmoS: Cun il Concordat HarmoS (art. 6) daventan obligatorics 2 onns da scolina. Uschia dura il temp da scola obligatoric 11 onns. La scolina ed il stgalim primar duran 8 onns. Il stgalim secundar I dura 3 onns. Tenor questa moda da quintar daventa il 1. onn da scola primara vertent il 3. onn da scola, il 2. il 4. e.u.v. Il Concordat HarmoS vegn realisà il pli tard per il cumenzament da l'onn da scola 2015/2016.

Questa pagina per: Deutsch Français Italiano English

Ultima actualisaziun da questa pagina: 26.06.2018

Services

Job