Midada dal stgalim secundar I al stgalim secundar II

La midada dal stgalim secundar I al stgalim secundar II vegn considerada da blers giuvenils sco difficila. Ils chantuns, la Confederaziun e las organisaziuns dal mund da lavur (OdML) han lantschà ils onns 2006 fin 2010 il project «Midada scola obligatorica – stgalim secundar II» per analisar ils problems sco er per prender mesiras che servan a meglierar la midada da la scola obligatorica al stgalim secundar II. Ins ha tranter auter prendì per mauns ina meglieraziun dals process da la tscherna da professiun, ina meglieraziun da la coordinaziun da las pretensiuns dal stgalim secundar I cun quellas dal stgalim secundar II (profils d'exigenzas per la furmaziun fundamentala professiunala), la registraziun ed il sustegn tempriv da gruppas problematicas gia durant la scola obligatorica (management da cas furmaziun professiunala) u l'elavuraziun da facturs rinforzants che gidan ils giuvenils cun situaziuns da partenza difficilas da far cun success ina furmaziun fundamentala professiunala. Cun las mesiras che servan a meglierar la midada da la scola obligatorica al stgalim secundar II vegni cuntinuà. 95% da las absolventas e dals absolvents da la scola obligatorica han cumenzà entaifer 2 onns cun ina scolaziun dal stgalim secundar II.

Questa pagina per: Deutsch Français Italiano English

Ultima actualisaziun da questa pagina: 08.06.2018

Services

Job