Process da Bologna

Il process da Bologna è in process cumplessiv per renovar la furmaziun da scola auta. Ses intent è quel da crear in spazi europeic da scola auta sco er da rinforzar la cumpetitivitad da l'Europa sco lieu da furmaziun. Il process è vegnì lantschà l'onn 1999 cun las suandantas finamiras:

  • crear in sistem da certificats e da diploms bain chapibels e cumparegliabels

  • crear in sistem da studi da dus stgalims (bachelor/master)

  • introducir in sistem da credit (ECTS)

  • promover la mobilitad ed eliminar obstachels per la libra circulaziun

  • promover la collavuraziun europeica per la garanzia da qualitad e per l'evaluaziun

  • promover la dimensiun europeica en il sectur da las scolas autas.

La Svizra ha suttascrit la Decleraziun da Bologna l'onn 1999. Qua tras han tut las scolas autas svizras (universitads, SPF, scolas autas spezialisadas, scolas autas da pedagogia) renovà fundamentalmain lur structuras ed ils cuntegns da lur studis. Tranter auter èn las scolaziuns fundamentalas d'in stgalim a las scolas autas vegnidas transferidas en in sistem da dus stgalims cun diploms da bachelor e da master.


En il rom dal process da Bologna è vegnì deliberà in rom da qualificaziun naziunal per il sectur da las scolas autas svizras. Quel descriva e definescha ils stgalims da la furmaziun da scola auta en Svizra tranter auter a maun da las cundiziuns d'admissiun e dals diploms. Il rom da qualificaziun duai servir a las scolas autas sco orientaziun per concepir e per descriver lur studis e lur programs da studi. Plinavant duai vegnir meglierada l'infurmaziun davart il sistem svizzer da scolas autas, en spezial areguard l'instrucziun. Plinavant daventi pli simpel da cumparegliar ils diploms ed ils certificats en l'Europa, e la transparenza vegn promovida.

Questa pagina per: Deutsch Français Italiano English

Ultima actualisaziun da questa pagina: 08.06.2018

Services

Job