Purschidas e clusiuns da la furmaziun supplementara

Noziuns-clav : Diplom professiunal per persunas creschidas

La furmaziun supplementara vegn fatga en differents contexts. La purschida da curs da la furmaziun supplementara è fitg gronda e sa differenziescha concernent las finamiras, concernent ils cuntegns e concernent la durada, tut tenor la gruppa en mira. I dat in grond dumber da purschiders privats, statals, manaschials, d'utilitad publica u cun finamira da rendita che offreschan furmaziuns supplementaras. Latiers tutgan tranter auter:

  • purtaders da dretg public (tranter auter scolas autas universitaras, scolas autas spezialisadas, scolas autas da pedagogia, scolas spezialisadas superiuras, scolas professiunalas spezialisadas)

  • purtaders da dretg privat cun finamira da rendita

  • manaschis

  • purtaders da dretg privat senza finamira da rendita (tranter auter organisaziuns d'utilitad publica, universitads popularas, organisaziuns per la furmaziun da geniturs e.u.v.)

  • purtaders socials, politics, confessiunals u ideologics (organisaziuns dal mund da lavur, sindicats, baselgias chantunalas e.u.v.)

  • federaziuns ed organisaziuns da tetg

  • furmaziun supplementara en gruppas ch'èn s'organisadas sezzas

La gronda maioritad da las instituziuns da furmaziun supplementara sa chatta en mauns privats e vegn finanziada da quellas parts che profitan da la furmaziun supplementara. Tut tenor il context, en il qual la furmaziun supplementara ha lieu, datti in sustegn finanzial dal stadi. En il sectur da la furmaziun supplementara professiunala han ils manaschis ina rolla impurtanta, saja quai che manaschis porschan in'atgna furmaziun supplementara, saja quai ch'els sa participeschan a la furmaziun supplementara da lur collavuraturas e da lur collavuraturs.

Cundiziuns da recepziun

Las cundiziuns d'admissiun dependan dal gener da la furmaziun supplementara. Per la gronda part da las purschidas da furmaziun supplementara na datti naginas cundiziuns d'admissiun spezialas. Cundiziuns d'admissiun spezialas pon valair tar tscherts programs da furmaziun supplementara da scolas autas (Master of Advanced Studies [MAS], Diploma of Advanced Studies [DAS], Certificate of Advanced Studies [CAS]) u da scolas spezialisadas superiuras (studis da diplom supplementar). En quest connex vegn per regla pretendì in diplom da scola auta u ina furmaziun preliminara equivalenta.

Organisaziun da la furmaziun supplementara

La structura dals curs e dals studis, il temp che vegn duvrà, las furmas per cumprovar las prestaziuns e.u.v. èn fitg differents e dependan da la furmaziun supplementara tschernida. Dapi mez dals onns 90 è s'etablida – en il sistem svizzer da furmaziun supplementara – la scolaziun modulara en blers secturs. Moduls èn unitads isoladas che pon vegnir frequentads independentamain in da l'auter u che pon vegnir cumbinads cun auters moduls ad in tschert studi. Il sistem modular è in sistem avert e permeabel.

Clusiun

Il tip da clusiun variescha d'occurrenza da furmaziun supplementara ad occurrenza da furmaziun supplementara. Ils purschiders pon consegnar agens certificats u atgnas confermas da curs che n'èn betg renconuschids dal stadi u dal chantun. A scolas autas pon – ultra da las confermas da curs – er vegnir acquistadas las suandantas clusiuns: Master of Advanced Studies (MAS): almain 60 puncts dad ECTS; Diploma of Advanced Studies (DAS): almain 30 puncts dad ECTS; Certificate of Advanced Studies (CAS): almain 10 puncts dad ECTS. Studis da diplom supplementars a scolas spezialisadas superiuras serran cun in diplom federal renconuschì. Al tip da furmaziun vegn agiuntada la cumplettaziun SDS SSS (p.ex. controlladra dipl. SDS SSS/controllader dipl. SDS SSS). En il sectur da la furmaziun da cumpensaziun sin il stgalim secundar II vegnan fatgas clusiuns renconuschidas da la furmaziun formala (attestat da maturitad gimnasiala, certificat da scola media spezialisada, attestat da maturitad spezialisada, attestat federal da qualificaziun, attestat da maturitad professiunala).

En il rom da la furmaziun da recuperaziun pon vegnir fatgs posteriuramain divers diploms. Pussaivels èn differents proceders. Diploms renconuschids sco il certificat da la maturitad gimnasiala, il diplom da la scola media spezialisada, l'attestat da la maturitad spezialisada, l'attestat federal da qualificaziun ubain l'attestat federal da la maturitad professiunala tutgan tar la furmaziun formala e betg tar il perfecziunament.

Questa pagina per: Deutsch Français Italiano English

Ultima actualisaziun da questa pagina: 20.12.2018

Services

Job