Regulaziun da la furmaziun professiunala

Tenor la Lescha federala davart la furmaziun professiunala (LFPr) è la furmaziun professiunala ina incumbensa cuminaivla da la Confederaziun, dals chantuns e da las organisaziuns dal mund da lavur (OdML):

  • Confederaziun

    La Confederaziun, represchentada tras il Secretariat da stadi per furmaziun, retschertga ed innovaziun (SEFRI), s'occupa da la regulaziun strategica e dal svilup da l'entira furmaziun professiunala. Tar las incumbensas tutgan tranter auter la legislaziun, il decret d'ordinaziuns da furmaziun per la furmaziun fundamentala professiunala, la renconuschientscha d'urdens d'examen e da studis da la furmaziun professiunala superiura, la garanzia da la qualitad e l'ulteriur svilup dal sistem general sco er la promoziun d'innovaziuns. La Cumissiun federala per la furmaziun professiunala (CFFP) cusseglia il SEFRI cunzunt en dumondas dal svilup e da la coordinaziun da la furmaziun professiunala. La Confederaziun è cumpetenta per la scolaziun e per la furmaziun supplementara da las persunas ch'èn responsablas per la furmaziun professiunala. L'Institut federal da scola auta per la furmaziun professiunala IFFP è il center da cumpetenza da la Confederaziun per l'instrucziun e la perscrutaziun en la pedagogia da las professiuns, en la furmaziun professiunala ed en il svilup da las professiuns. Sias incumbensas principalas èn la scolaziun da las persunas d'instrucziun e da las persunas ch'èn responsablas per la furmaziun professiunala sco er il svilup da la perscrutaziun da la furmaziun professiunala.

  • Chantuns

    Ils chantuns concepeschan l'execuziun da la legislaziun federala e procuran per la surveglianza da la furmaziun professiunala. En il sectur da la furmaziun fundamentala professiunala èn ils chantuns tranter auter responsabels per il marketing da las plazzas d'emprendissadi. Las differentas incumbensas vegnan ademplidas per regla tras ils uffizis chantunals per la furmaziun professiunala. Ils uffizis chantunals per la furmaziun professiunala èn suttamess als departaments chantunals resp. a las direcziuns chantunalas d'educaziun u en paucs cas al departament chantunal resp. a la direcziun chantunala d'economia publica. Sin plaun interchantunal èn las scheffas ed ils schefs dals uffizis per la furmaziun professiunala s'unids en la Conferenza svizra dals uffizis per la furmaziun professiunala (CSFP). La CSFP sustegna la coordinaziun e la cooperaziun en la furmaziun professiunala ed uschia er l'execuziun dal dretg federal en ils chantuns ed en las regiuns. La gestiun da posts chantunals d'infurmaziun e da cussegliaziun professiunala è medemamain chaussa dals chantuns. Dapi l'onn 2007 exista il Center svizzer da servetschs per la furmaziun professiunala, cussegliaziun da professiun, da studi e da carriera (CSCP) che furnescha servetschs en champs d'incumbensa ch'èn vegnids surdads als chantuns tras la Lescha federala davart la furmaziun professiunala. Ils chantuns u persunas privatas mainan las instituziuns da furmaziun da la furmaziun professiunala.

  • Organisaziuns dal mund da lavur (OdML)

    Tar las organisaziuns dal mund da lavur (OdML) tutgan federaziuns professiunalas ed organisaziuns da branscha, partenaris socials, autras organisaziuns ed auters purschiders responsabels per la furmaziun professiunala sco er interpresas e persunas privatas. Las federaziuns professiunalas e las organisaziuns da branscha defineschan ils cuntegns da la furmaziun e las proceduras naziunalas da qualificaziun, mainan tras ils curs intermanaschials en la furmaziun professiunala e mettan a disposiziun purschidas en la furmaziun professiunala superiura. En il rom da lur pussaivladads mettan interpresas e persunas privatas a disposiziun plazzas d'emprendissadi en la furmaziun fundamentala professiunala. Lur participaziun a la furmaziun professiunala è voluntara.

Questa pagina per: Deutsch Français Italiano English

Ultima actualisaziun da questa pagina: 17.12.2018

Services

Job