Scola obligatorica

Noziuns-clav : Expensas per la furmaziun / Standards da furmaziun / HarmoS / Svilup e garanzia da la qualitad en il sectur da furmaziun / Plans d'instrucziun linguistics regiunals / Cundiziuns generalas giuridicas en la pedagogia speziala / Mobilitad e barat

L'obligaziun d'ir a scola dura 11 onns. Il stgalim primar – inclusiv 2 onns scolina u ils emprims 2 onns d'in stgalim d'entrada – cumpiglia 8 onns, il stgalim secundar I 3 onns. En il chantun Tessin dura il stgalim secundar I (scuola media) 4 onns. Al cumenzament da lur temp da scola obligatoric han ils uffants per regla 4 onns.

I dat intgins paucs chantuns en la Svizra tudestga, nua che la scolina n'è betg obligatorica u nua ch'ella vegn frequentada obligatoricamain mo 1 onn. Ma er en quests cas va la gronda maioritad dals uffants per regla durant 2 onns a scolina. En intgins chantuns da la Svizra tudestga pon las vischnancas manar in stgalim fundamental u stgalim da basa (furma dal stgalim d'entrada). Tar questa furma d'organisaziun frequentan ils uffants da 4 fin 8 onns resp. da 4 fin 7 onns la medema classa. En la Svizra franzosa quintan ils onns da scolina per regla tar il «cycle 1» u «cycle primaire 1» che dura 4 onns. En il chantun Tessin vegn purschì supplementarmain als 2 onns da scolina obligatorics 1 ulteriur onn per uffants a partir da 3 onns.

Organisaziun da la scola obligatoria

Ils chantuns èn responsabels per la scola obligatorica. Els fixeschan ils plans d'instrucziun ed ils uraris e decidan davart ils meds d'instrucziun. Tenor la Cunvegna interchantunala davart l'armonisaziun da la scola obligatorica ha lieu l'armonisaziun dals plans d'instrucziun e la coordinaziun dals meds d'instrucziun sin il plaun da las regiuns linguisticas. La Svizra franzosa ha gia introducì il «Plan d'études romand (PER)». En ils chantuns germanofons e plurilings è avant maun il Plan d'instrucziun 21. L'introducziun dal plan d'instrucziun è chaussa dals chantuns. En il chantun Tessin è il Piano di studio en la fasa d'introducziun. Las vischnancas organiseschan il manaschi da scola. Las fermas ragischs localas permettan da realisar soluziuns adattadas al lieu.

La frequentaziun da la scola publica obligatorica è gratuita per tut ils uffants. 95% dals uffants frequentan instituziuns publicas. L'obligaziun d'ir a scola vala er per uffants che n'han betg in status da dimora reglà. En scola sa scuntran scolaras e scolars cun differents stadis da svilup, cun differentas capacitads da prestaziun cun differentas derivanzas socialas e linguisticas sco er cun differents cumportaments. L'eterogenitad da prestaziun e da talent da las scolaras e dals scolars sco er l'eterogenitad culturala da las classas è ina gronda sfida per la scola. Cun mesiras correspundentas garantescha la scola in emprender cuminaivel. Las scolaras ed ils scolars pon profitar d'ina instrucziun differenzianta ed individualisanta e vegnan sustegnids en moda individuala da las persunas d'instrucziun da la scola regulara u eventualmain da persunas spezialisadas (p.ex. pedagogas e pedagogs curativs da scola). Tar las mesiras da promoziun en la scola regulara tutgan tranter auter la promoziun d'uffants talentads, la promoziun linguistica, la promoziun linguistica per uffants da lingua estra, la promoziun en singuls roms, la logopedia, la psicomotorica e.u.v. Sch'il basegn da promoziun surpassa las pussaivladads da l'instrucziun regulara, vegnan applitgadas mesiras rinforzadas.

Questa pagina per: Deutsch Français Italiano English

Ultima actualisaziun da questa pagina: 23.02.2018

Services

Job