Standards da furmaziun

Ils standards da furmaziun naziunals gidan ad armonisar las finamiras d'instrucziun da la scola obligatorica sin nivel naziunal. Ultra da quai èn els ina basa per controllar la qualitad dal sistem da furmaziun en il sectur da la scola obligatorica e vegnan en il futur a daventar ina part integrala dal monitoring naziunal da la furmaziun.


La Cunvegna interchantunala davart l'armonisaziun da la scola obligatorica (Concordat HarmoS) furma la basa giuridica per sviluppar e per applitgar standards da furmaziun naziunals.

Il concordat HarmoS numna dus geners da standards da furmaziun:

  • Standards da prestaziun (art. 7 al. 2 lit. a) descrivan nivels da cumpetenza che sa refereschan al rom e che ston vegnir cuntanschids da las scolaras e dals scolars. Els pon vegnir mesirads e controllads. Standards da prestaziun en furma da cumpetenzas fundamentalas èn vegnids sviluppads per quatter secturs spezials (lingua da scola, linguas estras, matematica e scienzas natiralas). Las cumpetenzas fundamentalas descrivan las capacitads e las abilitads fundamentalas sco er la savida fundamentala che las scolaras ed ils scolars ston s'acquistar en in tschert mument da la scola obligatorica. Las cumpetenzas fundamentalas èn pretensiuns minimalas: praticamain tut las scolaras e tut ils scolars duain cuntanscher questas pretensiuns. Las cumpetenzas fundamentalas èn finamiras per ina part da la furmaziun da scola. La totalitad da las finamiras da furmaziun vegn fixada en ils plans d'instrucziun linguistics regiunals.

  • Auters standards (art. 7 al. 2 lit. b) circumscrivan cuntegns da la furmaziun u cundiziuns per la realisaziun en l'instrucziun resp. pussaivladads e resursas che vegnan messas a disposiziun per l'emprender.

L'introducziun da las cumpetenzas fundamentalas naziunalas ch'èn avant maun actualmain è in process da plirs onns che vegn realisà cun agid dals plans d'instrucziun linguistics regiunals. Las lavurs respectivas èn vegnidas prendidas per mauns. Er per ulteriurs roms pon vegnir sviluppads standards.

Questa pagina per: Deutsch Français Italiano English

Ultima actualisaziun da questa pagina: 08.06.2018

Services

Job