Svilup e garanzia da la qualitad en il sectur da furmaziun

Il svilup e la garanzia da la qualitad en il sectur da furmaziun han l'intent da registrar la qualitad da la furmaziun e da la meglierar sistematicamain e cuntinuadamain. Instruments e mesiras dal svilup e da la garanzia da la qualitad pon vegnir duvrads sin differents plauns dal sistem da furmaziun:


Nivel dal sistem
Sin il nivel dal sistem concernan els il sistem da furmaziun. Latiers tutgan tranter auter il monitoring da la furmaziun en Svizra, la participaziun a studis da cumparegliaziun internaziunals u ad examens da pajais (PISA, examen da la OECD), l'examinaziun dals standards da furmaziun naziunals u monitorings chantunals da la furmaziun. Ultra da quai èn la renconuschientscha e l'accreditaziun d'instituziuns da la furmaziun e da studis sco er plans d'instrucziun e plans d'instrucziun generals interchantunals e naziunals meds approvads per garantir la qualitad.


Nivel instituziunal
Sin il nivel instituziunal pon scolas da tut ils stgalims u manaschis d'emprendissadi fixar concepts per garantir la qualitad u realisar mesiras per garantir la qualitad. Tar talas mesiras tutgan p.ex. posts da garanzia da la qualitad a scolas autas, il giudicament da la qualitad da la furmaziun en manaschis d'emprendissadi a maun da standards da qualitad definids (QualiCarte) u analisas da la situaziun da scolas singulas a maun d'autoevaluaziuns u d'evaluaziuns estras.


Nivel individual
Sin il nivel individual survegnan persunas d'instrucziun in feedback davart lur instrucziun da las scolaras e dals scolars, dals geniturs da talas e tals u da la direcziun da la scola ubain da l'autoritad da surveglianza. Las scolaras ed ils scolars vegnan giuditgads da las persunas d'instrucziun u survegnan ina determinaziun individuala da la posiziun a maun da tests d'autogiudicament. Sin tut ils plauns valan mecanissems cumparegliabels: analisar (stadi actual) > fixar finamiras (stadi previs) > prender mesiras > analisar e.u.v.


Monitoring da la furmaziun en Svizra

Tenor la Constituziun federala (art. 61a Cst.) han la Confederaziun ed ils chantuns l'incumbensa da procurar per in'auta qualitad dals fatgs da furmaziun. En quest rom han els installà cuminaivlamain in monitoring naziunal da la furmaziun. Il monitoring da la furmaziun metta a disposiziun la basa per observar e per sviluppar vinavant il sistem da furmaziun svizzer. In instrument impurtant è il rapport da furmaziun. Quel cumpiglia datas ed infurmaziuns da la statistica, da la perscrutaziun e da l'administraziun che concernan ils fatgs da furmaziun ed ils stgalims da furmaziun. El cumpara mintga 4 onns. Ils resultats e las constataziuns dal rapport da furmaziun duain sustegnair l'administraziun da furmaziun e la politica da furmaziun en la procedura da decisiun. Uschia han la Confederaziun ed ils chantuns fixà cun la «Decleraziun 2011» finamiras cuminaivlas da la politica da furmaziun per il spazi da furmaziun svizzer. Da questas finamiras deduceschan la Confederaziun ed ils chantuns mintgamai mesiras per lur champ da cumpetenza respectiv.

Cun il proxim rapport da furmaziun vegni examinà, sche questas finamiras èn vegnidas cuntanschidas e sche las mesiras prendidas han gì in effect.

Questa pagina per: Deutsch Français Italiano English

Ultima actualisaziun da questa pagina: 13.07.2018

Services

Job